Archives

போலிகள்…

இன்றைக்கு எங்கள் ஊர் திருவிழா
கிட்டத்தட்ட மொத்த ஊரும்
கொட்டிக் கிடக்கிறோம் 
இந்த குட்டி இடத்திற்குள்

குழந்தைகள் அடம்பிடித்து அழ
ஆங்காங்கே பலூன் கடைகள்

கசாப்புக்கடை கத்தியால்
வெட்டுவாங்கும் அல்வாக்கள்

ஐஸ்வண்டிகள்,தர்பூசணிகள்
பத்துரூபாய் பிளாஸ்டிக்குகள்

சவுக்கு மரங்கள்
வெயில்
சாமி
நாங்கள்.

சிகப்பு சுடிதார்…
அவள் தான் ,
அவளேதான் …
அருகில் சென்று
அழைக்கையில்
வேறொருத்தியாகியிருந்தாள்..

ஒவ்வொருவரும்
ஒவ்வொருவராக மட்டுமல்ல
ஒவ்வொருவருக்கும்
ஒவ்வொருவராகவும் இருக்கிறோம்.

என் தம்பியைப்போல ஒருத்தன்…
‘திலக்’கை போல ஒரு தாடிக்காரன்…
காந்திஜி போலொரு தாத்தா..

போல் இருக்கும் எல்லாமும்
போலிகள் தானே !
அப்படியென்றால்
எல்லோருமே போலிகள் தானோ !!
என வியக்கையில்

முதுகில் ஒரு அடி

“டே! கண்ணா !
இங்க என்ன செய்ற ! ”
“யாரு…”
என திரும்புகையில்
நானும்
ஒரு போலியாகியிருந்தேன்.

-விஜயன்.துரைராஜ்
19/07/2016

Advertisements